~母親節~

雖然聼日先係母親節，但係因爲要配合所有人o既時間，我地結果係今日同嫲嫲慶祝母親節。烏溪沙19家經過一年o既翻新之後，再一次開放俾我地入去，而今次亦係19家翻新後，我地伍家係裏面o既第一次聚會。其實同舊年冇咩分別，好似話淨係換咗個天花板。正因爲今日要入烏溪沙，我尋晚都係決定返入宿舍。

今日係宿舍整野整到5點幾，跟住就坐巴士過去馬鞍山。去到馬鞍山，因爲好似仲有d時間，所以就係個度行做一陣，順便買埋d下個星期要用o既野，之後先再去烏溪沙。入到去，原來大部分人都未到，只有嫲嫲、大伯娘、大伯父，同埋一d朋友到咗。將之前預備o既一束自製玫瑰花送俾嫲嫲，嫲嫲收到好開心！另外我亦都每個伯娘都有一朵玫瑰花。可能你會問我，點解你要送玫瑰花俾你d伯娘？其實原因好簡單，我返咗黎香港讀書之後，我所有伯娘、姑姐、姨媽同阿姨個個都好關心我，就好似我媽咪o甘，所以我覺得係母親節，我應該送番d野俾佢地。雖然送花好似好唔實際，但係自己整o既花，都算係我一份心意啦。至於媽咪，佢雖然係新加坡，但係我都會預備母親節禮物俾佢，不過可能要遲d先俾到佢。

今朝落咗一場好大o既雨，其實都有d擔心今晚可唔可以係屋外面bbq。不過好感謝神，今晚冇再落雨，所以我地可以照原定計劃係屋外面燒野食。除咗燒野食，我地另外都有好多其他o既野食，好似蝦沙律、炒麵等，都好好食。

食完飯，同d兄弟姐妹一起踢波！其實都唔係算係踢波，因爲我地都係係度將個波傳黎傳去，不過我最細個兩個細佬就玩得好開心啦，之後仲唔想走添呀~~~~~~

到走個時已經係十點幾啦，隨意都係決定返宿，聼日先返去婆婆度。今晚玩得好開心。唔知我地幾時再見呢？

今日原本有人話俾番d野我，但係到最後都係冇俾到，所以我又係咩都做唔到啦！><